ភ្នំពេញ៖ អគ្គលេខាធិការដ្ឋានក្រុមប្រឹក្សាសកម្មភាពជនពិការចេញសេចក្តីជូនដំណឹងស្តីពីការប្រឡងជ្រើសរើសយុវជនមានពិការភាពទៅចូលរួមពិធីប្រកួតប្រជែងជាសាកលផ្នែកព័ត៌មានវិទ្យាសម្រាប់យុវជនពិការឆ្នាំ២០២៣ នៅទីក្រុងអាប៊ូដាប៊ី សហព័ន្ធអារ៉ាប់អេមីរ៉ាត។

សេចក្តីជូនដំណឹងរបស់អគ្គលេខាធិការដ្ឋានក្រុមប្រឹក្សាសកម្មភាពជនពិការនៅថ្ងៃទី២៧ ខែមិថុនា ឆ្នាំ២០២៣ ជូនដំណឹងដល់យុវជនមានពិការភាពទាំងពីរភេទ ទូទាំងព្រះរាជាណាចក្រកម្ពុជាឲ្យដឹងថា ក្នុងឆ្នាំ២០២៣ នេះអង្គការស្ដារលទ្ធភាពពលកម្មជនពិការកូរ៉េ (RI Korea) បានអញ្ជើញយុវជនមានពិការភាពកម្ពុជា ចំនួន ៤រូប ដើម្បីចូលរួមប្រកួតប្រជែងជាសាកលផ្នែកព័ត៌មានវិទ្យាសម្រាប់យុវជនមានពិការភាព នៅទីក្រុងអាប៊ូដាប៊ី សហព័ន្ធអារ៉ាប់អេមីរ៉ាត និងតាមអនឡាញ នៅថ្ងៃទី២៤-២៩ ខែតុលា ឆ្នាំ២០២៣។

អគ្គលេខាធិការដ្ឋានក្រុមប្រឹក្សាសកម្មភាពជនពិការបញ្ជាក់ថា នឹងរៀបចំកម្មវិធីប្រលងប្រកួតប្រជែងជម្រើសថ្នាក់ជាតិ នៅថ្ងៃទី១៥ ខែកក្កដា ឆ្នាំ២០២៣ និងប្រកួតអន្តរជាតិពាក់កណ្តាលផ្តាច់ព្រ័ត្រ នៅថ្ងៃទី២៥-២៦ ខែកក្កដា ឆ្នាំ២០២៣ ចាប់ពីម៉ោង ៨:០០នាទីព្រឹក តទៅតាមអនឡាញ។ ចំពោះលីងអគ្គលេខាធិការដ្ឋាននឹងផ្តល់ជូនពេលក្រោយ៕